किरकोळ अपघात; एसटी चालकाला बेदम मारहाण

  अहमदनगर । नगर सह्याद्री किरकोळ अपघातातून तिघांनी एसटी चालकाला मारहाण केल्याची घटना सोमवारी रात्री माळीवाडा येथे घडली. कलीम मुन्शी सय्यद (व...

 

अहमदनगर । नगर सह्याद्री

किरकोळ अपघातातून तिघांनी एसटी चालकाला मारहाण केल्याची घटना सोमवारी रात्री माळीवाडा येथे घडली. कलीम मुन्शी सय्यद (वय 44 रा. बेलापुर खुर्द ता. श्रीरामपूर) असे मारहाण झालेल्या चालकाचे नाव आहे. त्यांनी कोतवाली पोलीस ठाण्यात दिलेल्या फिर्यादीवरून तीन अनोळखींविरूद्ध सरकारी कामात अडथळा निर्माण केल्याचा गुन्हा दाखल करण्यात आला आहे.

सय्यद शिवाजीनगर (पुणे) आगारात मागील 12 वर्षापासून काम करतात. ते दररोज पुणे ते औरंगाबाद एसटी बसच्या फेर्‍या करतात. ते सोमवारी विनावाहक शिवनेरी बस (एमएच 11 टी 9256) पुणे येथून घेऊन औरंगाबादकडे जात असताना माळीवाडा येथील छत्रपती शिवाजी महाराज पुतळ्याजवळ बसच्या पाठीमागून एक चारचाकी वाहन चिकटले होते. चारचाकी वाहन चालकाने सय्यद यांना, माझ्या गाडीचे नुकसान झाल्याचे सांगितले. सय्यद यांनी खाली उतरून पाहणी केली असता गाडीचालक व त्याच्यासोबतच्या इतर दोघांनी काही न विचारता सय्यद यांना लाथाबुक्क्यांनी मारहाण केली. 

त्यांनी शिवनेरी बसची चावी काढण्याचा प्रयत्न केला असता सय्यद यांनी विरोध केल्याने शिवीगाळ, दमदाटी करून मारहाण केल्याचे फिर्यादीत म्हटले आहे.