नागेश्वर मंदिरातील चोरीचा तपास न लावल्यास आंदोलन

पारनेर ग्रामस्थांचा पोलिसांना दिलेल्या निवेदनात इशारा  पारनेर | नगर सह्याद्री  शहरातील ग्रामदैवत नागेश्वर मंदिरातील चोरीचा तपास लावा अन्यथा ...

पारनेर ग्रामस्थांचा पोलिसांना दिलेल्या निवेदनात इशारा 

पारनेर | नगर सह्याद्री 

शहरातील ग्रामदैवत नागेश्वर मंदिरातील चोरीचा तपास लावा अन्यथा आंदोलन करण्याचा इशारा पारनेर शहरातील ग्रामस्थांनी पारनेर पोलीसाना दिलेल्या निवेदनात दिला आहे. याबाबतचे निवेदन पारनेर ग्रामस्थांतर्फे पारनेर पोलीस ठाण्याचे पोलीस निरीक्षक घनशाम बळप यांना देण्यात आले आहे. 

पारनेरचे ग्रामदैवत व राज्याच्या विविध भागातील भाविकांचे श्रद्धास्थान श्री नागेश्वर मंदिरातील पिंड व पार्वतीच्या तांदळ्यावरील सुमारे दहा किलो वजनाच्या साडेसात लाख रुपये किंमतीच्या चांदीच्या आवरणाची चोरी दिनांक १७ नोव्हेंबर रोजी करण्यात आली होती. बुधवारी रात्री साडेदहा ते शुक्रवारी पहाटे सहा वाजण्याच्या सुमारास ही चोरीची घटना घडली. चारचाकी वाहनातून आलेल्या किमान तीन अज्ञात चोरट्यांनी ही धाडसी चोरी करण्यात आल्याची प्राथमिक माहिती असून मुख्य प्रवेशद्वाराचे कुलुप तोडून श्री नागेश्वराच्या पिंडीवरील तसेच पार्वतीच्या तांदळ्यावरील चांदीच्या आवरणाची चोरी झाल्याचे त्यांच्या निदर्शनास आली होती घटनेची माहिती मिळताच विश्वस्त संजय वाघमारे, शिरीष शेटीया, उदय शेरकर यांसह पोलीस निरीक्षक घनश्याम बळप यांनी तातडीने मंदिराकडे धाव घेतली. अज्ञात चोरट्यांचा माग काढण्यासाठी नगर येथून श्वान पथकाला पाचारण करण्यात आले. श्वानाने मंदिराच्या पूर्वेला शंभर मीटर अंतरावरील मुख्य रस्त्यापर्यंत चोरट्यांचा माग काढला. तेथून चोरटे वाहनातून पसार झाले असावेत असा निष्कर्ष काढण्यात आला होता.  

दरम्यान चोरी होऊन तीन दिवसांनंतरही चोरट्यांबाबत कोणताही सुगावा लागत नसल्याचे दिसून आल्याने पारनेर शहरातील ग्रामस्थ व भाविकांनी पारनेर पोलीस ठाण्याचे पोलीस निरीक्षक घनशाम बळप यांची भेट घेऊन त्यांना या घटनेचा लवकरात लवकर तपास करून चोरट्याना जेरबंद करण्याची मागणी करत आंदोलनाचा इशारा दिला आहे.

यावेळी नागेश्वर मंदिर उत्सव समितीचे अध्यक्ष संजय वाघमारे, दत्तात्रय अंबुले, शिरीष शेटीया, शांताराम रायसोनी, दिनकर बडवे, विजय डोळ, उदय शेरकर, राष्टवादी काँग्रेसचे उपाध्यक्ष अर्जुन भालेकर, सामाजिक कार्यकर्ते शाहीर गायकवाड, रा.या. औटी, नगरसेवक अशोक चेडे, सचिन औटी, नंदकुमार औटी, योगेश मते, बाळासाहेब कावरे, बाळासाहेब नगरे, भूषण शेलार, श्रीकांत चौरे, सचिन नगरे, अकील शेख, विनोद गोळे, संजय देशमुख, बंडू गायकवाड, राजू शेख, सतीश म्हस्के, कल्याण थोरात, योगेश वाघ, प्रवीण औटी, संजय पोळ, दादासाहेब शेटे व धीरज औटी, सौरभ गंधाडे, युवराज दिवटेंसह ग्रामस्थ उपस्थित होते.

श्रीनागेश्वर मंदिरातील चोरीच्या तपासासाठी पारनेर पोलीस ठाण्यासह स्थानिक गुन्हे अन्वेषण शाखेचे अधिकारी, कर्मचारी प्रयत्नशील आहेत. चोरी संदर्भात ग्रामस्थांना काही माहिती असल्यास, संशय असल्यास पोलिसांना कळवावे असे आवाहन पोलीस निरीक्षक घनश्याम बळप यांनी केले. सदर चोरी सराईत गुन्हेगारांनी केलेली नसावी. भुरट्या चोरांकडून चोरी झाली असावी असा अंदाज बळप यांनी व्यक्त केला.