जयंत पाटील यांच्या मुलाचे लग्न: भव्य शामियाना, संगीत रजनी आणि बरंच काही...

मुंबई । नगर सह्याद्री -  दोन लाख लग्नपत्रिका, मतदारसंघासह वाळवा तालुक्यात घरटी पोहोचलेले आग्रहाचे आवतन, हजारो चौरस फुटांचा शामियाना, चकाचक र...

मुंबई । नगर सह्याद्री - 

दोन लाख लग्नपत्रिका, मतदारसंघासह वाळवा तालुक्यात घरटी पोहोचलेले आग्रहाचे आवतन, हजारो चौरस फुटांचा शामियाना, चकाचक रस्ते, एकाच वेळी हजारो लोकांची उदरभरणाची व्यवस्था आणि मातब्बरांच्या स्वागताची जय्यत तयारी. एका शाही विवाहासाठी इस्लामपूरनगरी सज्ज झाली आहे. राष्ट्रवादीचे प्रदेशाध्यक्ष आ. जयंत पाटील यांच्या ज्येष्ठ चिरंजीवांचा शाही विवाह सोहळा रविवारी होत असून त्याची लगबग जिल्ह्यात सुरू आहे.

कासेगावच्या पाटलांच्या वाड़यावर गेला महिनाभर लघीनघाई सुरू असून स्व. राजारामबापू पाटील यांचे नातू प्रतीक यांचा हा विवाह राजारामनगर येथे होत आहे. यासाठी उद्योगपती राहुल किर्लोस्कर यांची कन्या अलिका ही वधू आहे. या विवाहाची चर्चा राजकीय व सामाजिक पातळीवर गेला महिनाभर सुरू आहे. तुलसी विवाहापासून मंडप उभारणी, केळवणासह अन्य विधी संगीत रजनीच्या साथीने सुरू आहेत. दस्तुरखुद्द आ. पाटील यांनीही एका संगीत कार्यक्रमात सहभागी होत ‘खामोश, यहाँ के असली खिलाडी हम है,’ असे सांगत असल्याची दृश्यफीत समाजमाध्यमावरही प्रसारित झाल्याने या विवाहाची उत्सुकता सर्वानाच आहे.विवाहासाठी राजारामनगरमध्ये भव्य शामियाना उभारण्यात आला असून वधूवरांसह यजमान शुभेच्छा स्वीकारण्यासाठी ज्या स्थळी उभे राहणार आहेत, त्या व्यासपीठाची एक मंदिर, घंटा या रूपात सजावट केली आहे. या व्यासपीठासमोर विशेष मान्यवरांची बैठक व्यवस्था असून महिलांसाठी स्वतंत्र कक्ष आहे. बियाणे मळा परिसरात भोजनाची व्यवस्था असून एका वेळी पाच हजारांना याचा लाभ घेता येईल. 

या शाही विवाहाच्या मातब्बर मान्यवरांसाठी एक, नातलगांसाठी स्वतंत्र आणि मतदारसंघातील घरटी व सामान्यांना देण्यासाठी एक अशा तीन पद्धतीच्या सुमारे दोन लाख लग्नपत्रिका वाटल्या आहेत. मुख्यमंत्री एकनाथ शिंदे, उपमुख्यमंत्री देवेंद्र फडणवीस, राष्ट्रवादी काँग्रेसचे अध्यक्ष खा. शरद पवार, विरोधी पक्ष नेते अजित पवार, खा. सुप्रिया सुळे, माजी मंत्री आदित्य ठाकरे यांच्यासह अनेक मंत्री, खासदार, आमदार, साखर कारखान्याचे अध्यक्ष, विविध पक्षांचे राज्य पातळीवरील नेते अशा मातब्बरांची पायधूळ यानिमित्ताने इस्लामपूरनगरीत पडण्याची शयता आहे. ‘याची देही, याची डोळा’ शाही विवाह सोहळा पाहता यावा यासाठी मंडपात आठ ठिकाणी लोज सर्किटची सुविधा असून वधू-वरांना शुभाशीर्वाद देण्यापूर्वी जमलेल्या वर्‍हाडी मंडळीसाठी खास मेजवानीची व्यवस्था आहे.