माहेरून पैसे आणण्यासाठी विवाहितेला घरातून हाकलले

अहमदनगर । नगर सह्याद्री  पुणे येथे घर घेण्यासाठी माहेरून 10 लाख रूपये न आणल्याने विवाहितेचा छळ करून घराबाहेर काढल्याची घटना घडली. पीडित विवा...

अहमदनगर । नगर सह्याद्री 

पुणे येथे घर घेण्यासाठी माहेरून 10 लाख रूपये न आणल्याने विवाहितेचा छळ करून घराबाहेर काढल्याची घटना घडली. पीडित विवाहितेने या प्रकरणी कोतवाली पोलीस ठाण्यात दिलेल्या फिर्यादीवरून पतीसह पाच जणांविरूध्द गुन्हा दाखल करण्यात आला आहे.

पती शाम राजेंद्र भोसले, सासरा राजेंद्र किसनराव भोसले, सासू विजया राजेंद्र भोसले, दीर राहुल राजेंद्र भोसले, जाऊ पुजा उर्फ स्नेहल राहुल भोसले (सर्व रा. शाहुनगर, केडगाव) यांच्याविरूध्द गुन्हा दाखल झाला आहे.

 1 डिसेंबर 2019 रोजी फिर्यादीचे लग्न शाम राजेंद्र भोसले याच्यासोबत झाले होते. लग्नानंतर काही दिवसांनी पती, सासू, सासरे, दीर, जाऊ यांनी फिर्यादीला पुणे येथे नवीन घर घेण्यासाठी माहेरून 10 लाख रूपये घेऊन ये, असे म्हणत. फिर्यादीने पैसे न आणल्याने सासरचे सर्व लोक शाररिक व मानसिक त्रास देवू लागले. फिर्यादी पतीसोबत डांगेचौक (जि. पुणे) येथे भाडोत्री घरात राहत असताना त्यांना पती त्रास देत असे. पुण्यात नवीन घर घेण्याकरिता आईवडीलांकडुन 10 लाख रूपये घेऊन येण्याकरीता शिवीगाळ करून मारहाण करत असे.

मार्च 2022 मध्ये पती शाम याने फिर्यादीला शिवीगाळ करून लाथाबुक्यांनी मारहाण करत जीवे मारण्याची धमकी देत राहत्या घरातून हाकलून दिले. त्यानंतर फिर्यादी माहेरी राहत होत्या. त्यांनी 3 सप्टेंबरला भरोसा सेल येथे सासरच्या लोकांविरूद्ध तक्रार दिली. तेथे समझोता न झाल्याने भरोसा सेलने दिलेल्या पत्रानंतर कोतवाली पोलीस ठाण्यात गुन्हा दाखल करण्यात आला आहे.