शिंदे यांच्या नव्या पक्षाच्या निवडणूक चिन्हावर शीख समाजाचा आक्षेप!

शिवसेनेतील शिंदे गटाच्या 'बाळासाहेबांची शिवसेना' या नव्या पक्षाला 'दोन तलवारी आणि एक ढाल' या निवडणूक चिन्हावर नांदेडच्या शीख समाजाने आक्षेप घेतला आहे.

मुंबई/ नगर सह्याद्री - शिवसेनेतील शिंदे गटाच्या 'बाळासाहेबांची शिवसेना' या नव्या पक्षाला 'दोन तलवारी आणि एक ढाल' या निवडणूक चिन्हावर नांदेडच्या शीख समाजाने आक्षेप घेतला आहे. नांदेडच्या सचखंड गुरुद्वारा बोर्डाचे माजी सदस्य रणजितसिंग कामठेकर यांनी यासंदर्भात निवडणूक आयोगाकडे तक्रार करून ती रद्द करण्याची मागणी केली आहे. शिंदे गटाला दिलेले निवडणूक चिन्ह 'दोन तलवारी आणि ढाल' हे खालसा पंथाचे धार्मिक चिन्ह असल्याचे शीख समुदायाचे म्हणणे आहे. 

गुरुद्वारा सचखंड बोर्ड, नांदेडचे माजी सचिव रणजितसिंह कामठेकर आणि काँग्रेसच्या स्थानिक नेत्याने निवडणूक आयोगाला (ईसी) पत्र लिहून निवडणूक चिन्हाला धार्मिक अर्थ असल्याने परवानगी देऊ नये, अशी विनंती केली आहे. निवडणूक आयोगाने दखल न घेतल्यास कारवाईसाठी न्यायालयात जाण्याचा विचार करत असल्याचे त्यांनी सांगितले. कामठेकर म्हणाले, 'आमचे धर्मगुरू श्री गुरु गोविंद सिंग यांनी खालसा पंथाचे धार्मिक प्रतीक म्हणून तलवार आणि ढाल स्थापन केली होती. निवडणूक आयोगाने ज्या प्रकारे या गटांना त्रिशूळ आणि गदा ठरवून त्यांचा धार्मिक अर्थ असल्याचे कारण सांगून बाद केले, तर हेही धार्मिक बाब आहे.'