वासुंदे - खडकवाडी रस्त्यासाठी ७ कोटी रुपयांचा निधी मंजूर

आमदार नीलेश लंके हस्ते १५ ऑक्टोबरला शुभारंभ पारनेर / नगर सह्याद्री -  पारनेर - संगमनेर तालुक्याला जोडणारा व दळणवळणाच्या दृष्टीने महत्त्वपूर्...

आमदार नीलेश लंके हस्ते १५ ऑक्टोबरला शुभारंभ

पारनेर / नगर सह्याद्री - 

पारनेर - संगमनेर तालुक्याला जोडणारा व दळणवळणाच्या दृष्टीने महत्त्वपूर्ण असणाऱ्या वासुंदे ते खडकवाडी या ७ किलोमीटरच्या रस्त्यासाठी सात कोटी रुपयांचा निधी मंजूर केला असल्याची माहिती असल्याची माहिती आमदार नीलेश लंके यांनी दिली आहे. शनिवार दिनांक १५ ऑक्टोबर रोजी त्याचा शुभारंभ वासुंदे येथे होणार असल्याची माहिती गुरुदत्त पतसंस्थेचे संस्थापक अध्यक्ष बा. ठ. झावरे व माजी सरपंच महादू भालेकर व रविंद्र झावरे यांनी दिली आहे.

गेल्या अनेक वर्षापासून या रस्त्याची दुरावस्था झाल्याने खडकवाडी, मांडवे, पळशी, वासुंदे, माळवाडी, देसवडे, बोकनकवाडी, लाखेवाडी, शिक्री, कामटवाडी, टेकडवाडी  व परिसरातील वाडी वस्तीवरील लोकांनी हा रस्ता दुरुस्त करावा अशी मागणी वेळोवेळी आमदार लंके यांच्याकडे केली होती. त्यानुसार महाविकास आघाडी सरकारच्या काळात या रस्त्यासाठी ७ कोटी रुपये निधी रस्ता दुरुस्ती व मजबुती करण्यासाठी मंजूर करण्यात आला आहे. खडकवाडी वासुंदे परिसरातील १० ते १५ गावांसाठी हा रस्ता महत्त्वाचा मानला जात आहे. गेल्या अनेक वर्षापासून या रस्त्याची दयनीय अवस्था झाल्याने शेतकरी ऊस उत्पादक, कांदा उत्पादक व शाळकरी मुलांना खड्ड्यांचा त्रास सहन करावा लागत होता. तर हा रस्ता अरुंद असल्याने अपघातांची संख्या सुद्धा दिवसेंदिवस वाढत चालली होती. परंतु आता या रस्त्याच्या मजबुती करण व रूंदीकरणासाठी मोठा निधी मिळाल्याने या रस्त्याची दयनीय अवस्था दूर होणार असल्याची माहिती अमोल उगले, रविंद्र झावरे, सुदामराव शिर्के, संचालक रावसाहेब बर्वे यांनी दिली आहे.

नुसते नारळ न फोडता प्रत्यक्ष कामाला सुरुवात - आमदार लंके

पारनेर तालुक्यातील अनेक स्वयंघोषित नेते गावागावात व चौका चौकात नारळ फोडण्यात व फलक लावण्यात पटाईत असून आम्ही मात्र या वासुंदे ते खडकवाडी या रस्त्यासाठी ७ कोटी रुपयांचा निधी मंजूर करून आणला आहे. त्यामुळे इतरांसारखी नुसते नारळ न फोडता किंवा फलक न लावता प्रत्यक्ष कामाला सुरुवात करून मगच उद्घाटन करत असतो असा टोला आमदार लंके यांनी विरोधकांना लगावला आहे.

रस्ता कामाला आधी सुरुवात.. मग उद्घाटन समारंभ - ज्येष्ठ नेते बा .ठ .झावरे, पोपट साळुंखे

गेल्या अनेक वर्षापासून प्रलंबित असलेल्या खडकवाडी ते वासुंदे रस्त्यासाठी एवढ्या मोठ्या प्रमाणात निधी राष्ट्रवादी काँग्रेसचे आमदार नीलेश लंके यांनी निधी उपलब्ध पलब्ध करून दिला असून यामुळे या रस्त्याची दयनीय अवस्था दूर होणार आहे. तर दुसरीकडे महाविकास आघाडीच्या सरकारच्या माध्यमातून या सात किलोमीटरच्या रस्त्यासाठी एवढ्या मोठ्या प्रमाणावर निधी उपलब्ध करून दुर्गम भागाला खऱ्या अर्थाने न्याय दिला असल्याची प्रतिक्रिया गुरुदत्त संस्थेचे संस्थापक अध्यक्ष बा.ठ.झावरे, ग्रामपंचायत सदस्य पोपटराव साळुंके, ज्येष्ठ नेते भागूजी दादा झावरे यांनी व्यक्त केली आहे.